Saturday, July 26, 2008

FULUNK CHUKLO


FULUNK CHUKLO



Mhojea darantlo gulmohor
Ondum fulunk chuklo
Tacher patyeun mog kel’lo
Chonvorche poilinch suklo

Horxim boro dor vorsak
Pausa poilinch fultalo
Tachea pondak mog mhojo
Varea vangdda dholtalo

Ondum kainch somzona
Ragan kiteak bosla
Konnak bhivun ravla mono
Kai avaz golleak dosla

Gulmohora! Oxench chol’lear
Fuddem zatlem koxem
Yetlo votlo hansta mhaka
Mhonttat laglam pixem



Guadalupe Dias

AMI BHETTLIM TEDNAM



AMI BHETTLIM TEDNAM


Tuji mhoji poilich bhett
Chinche pondak ghoddli
Tea disachean chinchen
Apli ambottsannui soddli


Mollban kensam ambaddo
Holluch maner soddlo
GUspun uril’lo suria gullo
Sohoz doryant poddlo


Tuje mhoje bhettechi
Vareak mosti choddli
Chondrakui ailo bhar
Ratik vengent oddly


Vhalla deger konnkek
Nazuk hatho ful’lo
Ruperi dova thembo
Loze zhaddak bhul’lo


Tuje mhoje bhetten
Soiman kelo xrungar
Surnganchea zhaddakui
Amrutacho ailo hunvar


Poile bhettecheo yadi
Monant azun ghaltat sad
Sogllem hanv visorlam
Yad asa hi ekuch yad


Guadalupe Dias
guadalupedias@yahoo.com

SONDEX



S O N D E X



Dhanvtea kumpanom
Mhojem ek kam korxat ?
Ghorkar gela pordexant
Taka mhojo sondex diuxeat ?

Taka mud’dom sangat
Sarkench mone zalam hanv
Sokall sanz ,dis rat
Vhonttar ghollta
Tachench nanv

Toxem pollounk gelear
Hanga kainch unnem nam
Punn zachi chodd goroz
Toch mat hanga nam

Dhanvtea kumpanom
Sambhllat varem yeta
Mhozo sondex fafsot
Mhaka bhirant dista

-Guadalupe Dias

AMI BHETTLIM TEDNAM


AMI BHETTLIM TEDNAM



Tuji mhoji poilich bhett
Chinche pondak ghoddli
Tea disachean chinchen
Apli ambottsannui soddli


Mollban kensam ambaddo
Holluch maner soddlo
GUspun uril’lo suria gullo
Sohoz doryant poddlo


Tuje mhoje bhettechi
Vareak mosti choddli
Chondrakui ailo bhar
Ratik vengent oddly


Vhalla deger konnkek
Nazuk hatho ful’lo
Ruperi dova thembo
Loze zhaddak bhul’lo


Tuje mhoje bhetten
Soiman kelo xrungar
Surnganchea zhaddakui
Amrutacho ailo hunvar


Poile bhettecheo yadi
Monant azun ghaltat sad
Sogllem hanv visorlam
Yad asa hi ekuch yad


Guadalupe Dias
guadalupedias@yahoo.com

JIVITACHER MOG KORAT


JIVITACHER MOG KORAT

Ixttanom ,mayemogacho nomoskar!

Az hnavem, mogachea dhageanim vinnil’lea vostrak guttlaun ,kaim oxe vichar haddleat ze vorvim, hanv, tumkam fokot sangunk sodtam ki jivitacher mog korat .
Zevonn,nhesonn ani asro heo monxcheo tin mullaveo gorzo oxem xallent xikoitanam amche teacherin kallea follear, dhovo khoddu gheun boroil’lim utram azunui mhoje monache faskent tazim asat. Apnnem kitem xikoilam tem 100 ttok’ke khorem mhunn dakhounche khatir tinnem kaim deki-i dil’leo tancheoi yadi mhojea monachea konxak ghor korun asat. Khorem mhollear zem kitem pustokant asa tench tinnem amkam sompem korun xikoil’lem. Zait ghoddie ticho sangpacho hetu itloch axil’lo ki monxak zogpa khatir heo mullaveo tin gorzo lagtat.

Kaim tempan xallentlem jivit somplem, bhurgeponnui fattim ravlem ani jinnen ek vegllench vollon ghetlem. Pirai vaddli toxe kallzache ani monachei haves vaddle ani ek dis ocholloi somzolem, zogop ani jievop hantunt zomin-mollba itlo forok asa. Zogpa khatir zevonn, nhesonn ani asro zai,punn jievpa khatir mog zai!
Mog! Jivak thakai diupi bhavnam! Mog! Konnacher korcho? Promannik ponnan sangchem zalear mog, nisvarthi soimacher korcho. Orthan,sanzvellar apunn mavolltolo hem zanna zaunui neman udeupi suriacher korcho. Sogllim lharam todddir pavchinant hacho dixttavo ghoddil’lo astanai lharam nirmann korpi doryacher dorcho.

Ghontterant,aplea tantiam vangdda kogllachim tantiam uboupi pixea kavlleacher korcho. Ratbhor dhovachea othembeak vengent gheun sopnam rongoupi, suryachea poileach kirnnant, apleak heach othembean fottoilem hachi porva korinastanam ,varea vangdda xant dholpi tonnache patyer korcho. Mog! Aplim mullam chiklant romleant hem visrun mon bhulainno hanso hanspi sallkacher korcho.Pausachi, umollxiken vatt polloit fulpi, teach dhodddkanchea pausant pakllen-paklli vogddaun bospi gulmohoracher korcho. Aplea bhavnakodden khellpi chondrak, dor pautti titleach mogan yevkar diupi tea vishal mollbacher korcho. Apleak dhortoleachea bottancher, aplo’rong soddun vochpi fulpakheacher korcho. Mog! Dharechi khati gheun, renderan kallzak ghai ghalo tori, tantuntlean amrut koxem sur vhanvovpi maddacher korcho. Apunn zori, ekamekak kednach bhettunk xokonant tori apleacher dhanvpi rail gaddyechea adaran, kitlinxinch natim ani kallzam mellounk adar korpi, railwaychea pottreancher korcho. Aplea moneponnatlean, jinnecho montr xikoupi aboleacher korcho. Kantteam vangdda todd-zodd korpi gulabacher korcho ani Yexu krist, aplea xixeank mhonttale toxe “Tum tuzo mog korta tosoch tujea peleacho korcho.”

Mog ho vixoi hatalltanam, hanv fokot Shahajahan ani Mumtaz hanchench chitr tumchea dolleam mhukar ubhem korunk sodinam kiteak, itihas sangta tea promann ,yexu krist zednam aple proze khatir khursar melo tovui mog axil’lo. Hirkonni zednam aplea balla khatir svotache jivachi porva nam kortam Raigoddacho dongor denvli tovui mog axil’lo. Sri Krixnnachem logn zednam rukminni vangdda zalem ani aplea ani Krishna bhitor axil’le ixttagoticho, Radhen tyag kelo tovui mog axil’lo, zalear Mother Terezan, somazan poisail’lea lokanchi seva korpacho haves kallzant ballgilo ,tovui mog axil’lo.

Mog hea utrachem spoxttikoronn diunk hanvem zori koslench sanxodhan korunk nam tori punn hanv khatren sangunk xoktam ki monxachi bolaiki, tachea angant ghollpi rogtacher nimbun asta ani hem kam amchem kalliz korta. Orthan mog zaun asa ek oxi bhaxa zi kurd’de polloitat, bhere aikotat ani mone uloitat.
Lezlie de witherhead aplea pustokant ek oxi gozal boroita: Poilea vixv zhuza vellar, eka xipayan, aplea eka vangdeak, dusmanache xime bhitor soglloch ghayall zaun poddla to polloilo ani taka haddunk vochunk, aplea odhikarea kodden porvangi magli. Odhikarean sanglem, Thoim konnuch zito urunk xokonam. Ekadro tum, taka haddunk gelo zalear, tache vangdda tunvui mortolo. Tachim utram aikonastanam, xipai thom gelo ani vangddeak gheun ailo. Kiteak tor purai zhuzant,ixtt koxe te sangatan vavril’le .Taka haddpachea yotnant,dusmanacheo gullio hea xipayakui lagleo ani tacho ixttui somplo.

Sogllem polloun, odhikari tiddkolo, mhonnuk laglo, atam kainch faido zaunk nam. Don xipai mat unnem zale. Mornnache toddir axil’lea xipayan, hansot zap dili ‘Tum chukta, hanvem zem kitem kelam tacho bhorpur faido zala. Odhikarean ojeapit zaun vicharlem, Koslo faido? Samkar axil’lea mornnachi porva nam kortam,xipayan,xantponni zap dili Bhorpur faido zalo saiba….zednam hanv mhojea vangddeak haddunk gelom tednam tannni mhollem, Jim,tum yetlo mhunn hanv zannach aslom .Mogachi bhaxa odhikareak xikoit tannem prann soddlo. To soinik ghayall zal’lo astanaim, moga khatiruch kaim khinn jiyelo ani apleacher mog korpi konn tori asa heach vicharant somplo.

Hea adhunik jogant, ami sogllim ,zonn ekleak zai toxim zogunk xoktat punn jiyeunk mat, amkam dusreachi goroz lagta .Zaite pautt zogpachea bovallant ami jieunk visortat karann jieunk, amcher konnem tori mog korunk zai. Magir to khoincheai nateantlean asum yeta! Amcher konnui mog kortolo zalear, ami poilim dusreacher mog korunk zai. Kiteak mog khoreanich ek ghuspa-gondollachi bhavna! Sounsar zaun asa ek harso. Zednam tum tantunt polloita tednam tuzoch rupkar thoim dista. Koplak miryo ghalun polloit zalear tovui tuka tech nodrentlean polloita. Tum hanslear, tovui hansun, tuzo mogall ixtt zata.

Barik nirikxonn korxat zalear purai sounsarak, mogachi goroz asa. Dhortorer zogpi zonn ekleachea kallzantlean zednam mogache dhage bhair sortole ani tachem avronn vinnun purai sounsarak nhesoitle tednach sogllem vaitt pois sorun, khorea orthan ami jieunk xoktole ani pruthvicheruch, svorginchem raj yetlem.

Ixtanom! Dekhunuch anik ek pavtt mogan mhonttam, jivitacher mog korat….moganuch jivit sarat.


Guadalupe Dias